Akayad n Tmaziɣt deg BEM 2022 Imprimer

Akayad n Tmaziɣt deg BEM n Ledzayer 2022

“Timerǧiwt”, d azwel n uḍris i d-fkan aseggas-a (2022) deg Tmaziɣt deg ukayad n BEM n Ledzayer. Aḍris-ayyi d ayla n Massa Rabḥa Ɛaysu, kksen-t-id seg Tullisin i d-tessufeɣ aseggas n 2020 sɣur Tiẓrigin Achab.

Aḍris-ayyi yewwi-d awal ɣef lḥala n tmeṭṭut taqbaylit i d-yufan iman-is weḥd-s ass uzekka mi tedda d tislit, acku argaz-is yeǧǧa-tt, iruḥ ɣer Fransa, ifka-yas lɛehd ur tt-itettu. Deg iseggasen n 60/70/80, akken i ixuṣṣ weɣrum deg tmurt, ilemẓiyen akk ruḥen ɣer Fransa ad xedmen. Uɣalen akk d iɣriben. Leɣben-nsen ulac win ur t-id-yecnan; ama d Sliman, ama d Lḥesnawi.. Meɛna i ittuɣaḍen kter, d tulawin i ǧǧan deg tmurt. Taluft-ayyi aṭṭas daɣen i icnan fell-as; qqaren-as :taluft n Tmerǧiwt.

Tamerǧiwt ɣef yessawal uḍris-ayyi isem-is Taseɛdit. Taseɛdit, ɣur-s xemsa uɛecrin iseggasen nettat tettraju.Tettrebbi deg mmi-s Ɛmer iwakken ad d-yemɣur, tettraju argaz-is melmi ad d-yuɣal: "s Ɛmer akked ṭṭmeɛ n tuɣalin n uɣrib s axxam-is i tetteg ifadden i yiman-is".

Deg uḥric aneggaru n iseqsiyen i d-fkan deg ukayad-ayyi, ssutren-d tira n yiwen uḍris ullis (15 ar 20 ijerriḍen) ideg ara yili ukemmel n taluft n Taseɛdit mi d-yuɣal urgaz-is seg lɣerba. Annect-ayyi, ur yelli ccek, dayen ar ad yeǧǧen arrac ad ɛerḍen tira n tullisin, ɣas akken meẓẓeyyit.

Ad d-nesmekti   belli mači akk imazwaren n BEM deg Tmurt n Ledzayer sɛeddan akayad n Tmaziɣt. Maca skud i rennun seg useggas ar wayeḍ. Ad d-nesmekti daɣen  belli akayaḍ Tmaziɣt n lbak (BAC 2022) ad yili ass n 15 Juin i d-iteddun. Afud igerrzen akk i yimazwaren- nneɣ !


 
Partager cet article